1Cor 3 | ASO | STEP | Ido' neze zuhokizo, naza lengita ogo minuvoni' gameneu' nene lingine mono' gilamani' haza vete iga' adi'mine igii igi mili minii Kilisito' monovo danava've ne'mine nene olihe igi mili ami izipe ngomo ne'mine minani' nenako nemu' naza evene' ma O'moso'mi Sikalahuli'mo lo-ngimido' igi mili minavo ne'mo ga'ine lapa nomine' minave engi' mono' lo-ngemaa' uvodi'mine ogo lingine ma lo-lengemelodo' amivo

1 Corinthians 3

O'mososi Maka' Hamo' Gono Nodune Lo Paulo' Line'

1 Ido' neze zuhokizo, naza lengita ogo minuvoni' gameneu' nene lingine mono' gilamani' haza vete iga' adi'mine igii igi mili minii Kilisito' monovo danava've ne'mine nene olihe igi mili ami izipe ngomo ne'mine minani' nenako nemu' naza evene' ma O'moso'mi Sikalahuli'mo lo-ngimido' igi mili minavo ne'mo ga'ine lapa nomine' minave engi' mono' lo-ngemaa' uvodi'mine ogo lingine ma lo-lengemelodo' amivo 2 amuzo malehe gamazi ma lo-lengemamuvoni' ma ne neive. Haza lapa nomine' izipe amine nani' ma'mino lo-lingimuvoni' ma neive. A'mine gameneu' nene ozohote naa' ani' noso' niteto' nene lisihe' amani' nenako idisesi nene olihe lisihe' amave. 3 Lingine nene mono' gilamaveti monovo'ine ne'mido' nene ha e'metivo' vi nizave. Lingine lengiku' nene ge nivile' ogani ne givile' ogani li lukehe igi lolize hizaa' naangumu' nene noluve. Ido' ne'mine iga' nani' nene mono' gilamaveti monovo'nido' gehepeve nie'meti engi' ne'mine nizani' ma neive. 4 Ee, lolize hizi malite Paulo'ni noe'metune nilavo malite Apolo'ni noe'metune li laa' nani' nene mono' gilamaveti monovo'nido' nene nie'metave. 5 Lingine leli' nene hizi ho'li-lidi Apolo' nene evene' naba ve ido' Paulo' nene evene' naba ve li nanimu' laa' nave. Ne'mine mo lamilo. Laza nene haza gonolo' ve mino Guvelesi ve'mo gonote limido' limido' nene gono nodusivo a'mine gonoteloti' gihile've nene lingine Kilisito'nimu' gili ele'vole' ani' nene nizave. 6 Ido' naza nene ve ma mine gosoho' zuho' ive ma'mino mino O'moso'mi gamazi nene gana' lo-lingimuvoni' ma neive. Ido' Apolo' nene mine gizebo ve mino mine naba ilive lo noso ohizo lepe lepe ve ne'mino mino neni' gonolo' imine' molo O'moso'mi gamazi masi nene ogo lo-lingimine' ma neive. Laza nene gono daa'nivo' dokusivo O'moso asi've ne'mo gonote nene do gihile ize-lidine' ma neive.

7 Ve ma monoku' mine zuho' oga' ive nesi ido' mine gizebo ve ne'mine nesi nene haza inite' ve. O'moso ei' hamo' gihile do soto' oga' neine' neevo' nene inite' naba goloso neive. 8 Mine zuho' okuvosa mine gizebo ogo noso ohizo lepe lepe oga' neive nesi nene hamoli'mine ogo lisiheto' nosive. Nemu' nene gono dusine' votigilelo' votigilelo' laza hamo hamo' menite dalosusive. 9 Laza nene O'mososi maka' hamo' gono nodunivo lingine nene O'moso'mi mi've ne'minisa nene nizave. Ido' gepe' gamazi ma ato' nene O'moso'mo numuno do hizine' ne'minisa ne nizave.

10 O'moso'mo a'mine numuno nene do hizelesa gala giline' nemu' neni' nene nele'mize lamine' o-nido a'mine numuno gizelongumu' ve lo numuno lamine' gizaa' ave ne'mine lolo' o-nidavo nemu' nene a'mine numuno gizaa' ave nete numuno gizaakumu' ga'ine lamine' gilaa' nani' ne'mido' e'meto simeni lolo' ogo numuno do hizaa' ebe' amuzo malehe lamine' do lisihe' ogo lolo' okuve. Ne'mine okuvo evene' ma ingine nene a'mido' numuno nigizave. Nigizanako ve ma aza a'mine simeni lolo' uvodo' nene numuno gizelove loo ma do goloso ogalive. Mo ninge guno ogosa gizelive. 11 Numuno do oto gizaa' simeni lamine' nene ngeli ato' keke' mo lolo' amilisave. Numuno do oto gizaa' simeni lamine' nene mo neize. A'midokovo' nene numuno di oti gizilizave. Naza nene O'moso'mi numuno gizo do otaa' simeni nene Izesu' Kilisito' ei' hamo' nene neive losa noluve. 12 A'mine simenilo' O'moso'mi numuno nigizi mono' eze evenele li-ngimaa' nave ingine nene gono lamine' daa' nahe apa nite' iga' nave. Ne'mi monovo nene mo soto' oloseinako nemu' mono' li-ngimilizani' nene gamazi gihilevo' li-ngimilizave. Ladani igi li-ngimikelizave. Numuno nene oloku' lamiline' inite' minevo' minevo' inite' lamine' ngoli moni ido' siluva' geheni ido' geheni lamine' nevo'mine initedunu' gizilizahe ido' oloku' liline' inite' minevo' minevo' amiline' inite' za ne'mine ido' me'nihe ido' angaba nevo'mine initedunu' gizilizahe ne'mi monovo nene gamene nabalo' O'moso'mo do soto' oloseinako ha soto' oloseive. Gonolo' ve hamo hamoliti gono'ine'mi monovo nene do soto' olosa a'mine numuno di huli gizada gizada nene vite' oka' oka' ogavo olo' ne'mo lo'voto ne'mi monovo do soto' oloseive. 14 Ne'mine ogavo numuno lingela lamiline' nene a'mida gono di numuno gizave gizave nene gono'ine lamine' dado' meni dalisave. 15 Ido' numuno lingela lo osu' liline' nene a'mido' gono dave dave nene meni ngemamivo hazavo' minilisave. Ee, engi' nene O'moso'mo do ngu' izeleseiha evene' ma nene inite' mata'ine oloku' lavo inite'ine nomine' ne'mine mini hazavo' minilisave. Ee, O'moso'mo ei' gono've dunido' dunido' nene gono lamine' dahe damahe lo ize' molo-ledeleseinako gono goloso do nolone' nene a'mido' meni lamine' lemamoloseive.

16 Lingine muki' nene do nubuho ogo O'moso'mo neni' kekeize numu'ne ve lavo ei' Sikalahu've nene lengiku' mino molo neive ma nene nizave. Lingine a'minemu' nene gilamani' nevoba mo gili nizani' ma neive. 17 O'moso'mi numuno nene lengi' nene nizave. Ido' a'mine nene kekeize numuno nenako ve malite di goloso ilizani' nene O'moso'mo do goloso o-ngedeleseive.

18 Ido' me misubou' aleve nete lengikumu' gilavo otohato ve minani' noline' nene O'moso'mo lengikumu' gilivo lingine nene otohato ve nizave lo gele noloseive li gili lutine golo izamilo. Lengitati' evene' malite laza nene me misubou' gamazi otohato o minine' nene gele vevesunive otohato ve none li gili nilizani' nene O'moso'mo gilivo me misubou' alevete otohato gamazi ve li gilaa' nani' nene negi gamazi ve lo gelaa' neine' nenako nemu' nene otohato ve gihile lolo' ili ma nene ti' ogo monilize. Me misubou' aleveti ve'nido' nene negi ne'mine lolo' igi minilo. Ido' misubou' alevete otohato gamazi ve li gilaa' nani' nene O'moso'mo gilivo negi gamazi ve lo gelaa' neingumu' nene mono' godolou' ti' li gizi nizani' ma neive:

Otohato ve ga'ine gili nge li mini evene' go'ine izaa' nevo'mine navo
aza do soto' o-ngedo otohato ga'ine gilani' nene do gopo o-ngedaa' neive.
20 Ido' gamazi gohi ma ti' li gizi nizave:

Guvelesi ve aza otohato ga'ine gilaa' avete gilani' ga'ine nene
mo gele neive.
Ne'mine ogo ga'ine gilani' nene haza nite' ve lo gelaa' neive.
21 Nemu' nene lingine ho'li ato ato' mini mono' lo-lengemaa' unive haza evene' none' leli' hamo hamokumu' nene mono' lo-lemaa' ive naba nene e'metaa' noune' nenako evene' linge lengi' nene lingivile' ogosa none li lingine mulise ato ato' mili mini okodine di dizaa' nani' nene mo hulilo. 22 Inite' muki' nene mo lengi' initetine neine' nenako evene' leli' hamo hamokumu' nene evene' nabate ve li okodine di dizaa' nani' nene nanitekumu' ne'mine iga' nave. Ee, ado' neni' Paulo' ido' Apolo' ve Petolo' ve ido' misubou' inite' mata' muki' nizani' nesi ido' vetesi minevo' alevo' oga' nesi ido' helaa' nesi ido' idise soto' neine' inite' nesi ido' alinge' soto' iline' inite' nesi nene mo lengi' initekovo' ve. 23 Ne neine'za lingine nene Kilisito'ni nene nizave. Ido' Kilisito' nene O'moso'mine ve. Nemu' nene evene' haza O'moso'mi gonolo' aleve lelikumu' nene okodine di dizamilo.